Wiä sicher alli wüssed bin ich privat en mac user sit immer, nur wird de Zuestand immer schlimmer.
Ich han de Cholä i de Hand gha und ufs neuä MBP gwartet, relativ lang gwartet muesmer sägä. Und jetzt brüchti öpis und chan nid no länger wartä und hoffe dass zu Verstand chömed. Plus es paar unschöni Sachä a mim Mac Pro (wo aber eigentlich es super Grät isch) und s OS wo langsam aber sicher mit jedem Update (wemers sich denn wagt z'update) müesamer wird, wemer nid uf de cloud iphone7 schwebt, und tatsächlich will dass s Züg funktioniert.
Isch Windows besser, oder wär Linux de Hit. Kei Ahnig, scho ewig nüm brucht (Windows XP, und au das nid intensiv), und drum würis gern mol usprobiere, hani sowieso scho lang mol welä, jetzt bütets sich a.
Jetzt stecki i de Zwickmülli, rächt Cholä i d Hand neh, zum s volä Potential uszschöpfä, mitem Risiko viel in Sand zsetzä weni nid klar chum demit, oder wenig riskiere und öpis günschtigs chaufä, mitem Risiko es völlig unbefriedigends Grät ham und es Scheiss erlebniss obwohls vilicht gar nid a de Software lieht. Oder doch ab durch die goldene Mitte, was alli Vor und Nochteil us de anderne beide Variantä kombiniert.
Ja, ihr gsehnd...als Mac User ischmer sich gwöhnt chaufä oder nid chaufä, tuusig meh oder weniger und pasta. Ich bin völlig überforderet. Und wo zum Tüfel sind all diä Windows Grät mit de bessere Hardware zumene Bruchteil vom Pris vo denä immer alli reded? Schiintmer ehnder als chönti d Nötli grad dussä loh.
Also zu was ich vilicht bruch:
Ich han no de Mac Pro für s hertä Züg, und de wirds wohl vorläufig au blibä müese (halt au softwaretechnisch), dementsprechend bini bezüglich Leischtig nid so feschtgleit. Je meh dasses chan desto meh chani usprobiere, wasmer entgägächämti.
Natürlich bruchis für all diä übliche Alltagssächeli (surfä, videos, audios, chli Dokument, Text Dateiä und so). Ich wür aber scho au gern dehei mol chli chöne a öpis nid zu hertem schaffä, also chli Bildbearbeitig müsst scho au dinn liggä. Video wär toll, aber weiss nid wiä das isch bim Windows mit de Leischtig.
Wenn jetzt aber d Asag wär, für fascht nüt chunsch e Maschinä über wo super chasch Alltagszüg machä und Videos luege und so witer, aber e grossi Bilddatei isch schwierig, wär das evtl. glich e Option eifach zum mol chöne inäluege, und denn muesi halt min Arsch bis uf witeres öfter zum mac bewegä.
Bildschirm: eigentlich 15", bin aber au für anders offä wenns ratsam isch. wär toll wenns nid e totali Krücke isch, wenn möglich nid nur 1080 (ussert es isch en kompromiss wo vil bringt), und so dassmer nid nur im dunkle öpis erkennt.
Touch stellmer eigentlich nur bi denä cool vor wod chasch umklappä...gsehd no cool us, vor allem mitem Stift. Weiss halt nid wiä sehr ichs bimene andere wür bruuchä, do no niä gha. E bitz cool findi de Asatz aber scho es OS für beides zha, will Apple jo vo dem nüt will wüssä. Ich ha s IPad gern, aber es hindered mi dra produktiv zsi, willi das mitem IOS nid würklich chan (bzw. halt ebä nu i sehr limitierte Bereich).
Tastatur und Trackpad (nippel gits jo nur no bi de hertere Maschinä vo Dell und Lenovo): hed nid hinterletschti Priorität, willi wahrschindlich scho diä vom Laptop will nutzä (und zumindescht guet will chöne nutzä). Wenns es nummerä pad hed bini nid truurig (natürlich nid falls 13" oder so).
SSD
Wenn möglich nüt komplett zämägliimts. Upgradbarkeit isch s eintä, aber wenn das Züg so ufwändig zum usänandneh isch dassmers nid mol meh chan recycle findis ethisch scho feng rächt bedänklich...isch scho gnueg schlimm d Lag mit all denä Rohstoff wiä si isch. Au en wichtigä Punkt womi am neuä MBP so grausam aschiisst, also möchti nid de glich Seich i Windows unterstützä wenns nid mues si. Also je offener desto besser...wenn jetzt aber öpis inäglötet isch womer eh niä wür wellä wächslä, isch au keis Drama.
Ports: Eigentlich nüt würklich entscheidends, solangmers üblichä, wenn nid hed, so zumindescht chan adaptiere. Irgendwiä möglich (wasmer aber klar isch dass das je nachdem unrealistisch isch) thunderbolt 3, aber schön wär zumindescht usb-c...aber no schöner tb3 lol. Tüüri Grät chömed aber eigentlich nur in Frog wenns einä händ.
Chan mir öper hälfä, chamer mit dem irgendöpis i oder usschlüsse, oder isch das echli z'vil verlangt mit minä diffusä Vorstelligä wo nid wahnsinnig guet igränzed?
Oder gids nur scho Tipps bezüglich enere Produktreihä oder so?
Isch vo minä erwähntä Asätz obä ein de ratsamer (tür/günschtig etc.)?
Wiä isch das mit Linux? Im Netz findet mer zu jedem meh oder weniger vo "funktioniert ohni witeres tadellos" bis zu "das lauft nid und disses nid und eigentlich chaschs nid bruuchä".
Ich bin über jeglichi Versüech zur Hilfestellig froh, au wenns nid "nimm Model xyz" isch.
Im moment isch jo au no grad de Wandel bezüglich Prozessore im Gang, villicht chund grad öpis guets, oder es git öpis guets billiger will s neuä chund...(bi Dell isch z.B. bi de "Gschäftskategorie" villes billiger will grad updatet wird.
Aber ebä, ha kei Ahnig wiä vil besser s neuä isch)
ja äh...
Wahrschinlich chasches aber irgendwo istelle....au WiFi seti erkennt werde. Was füren Laptop heschder kauft?
