The(G)Forum

Han ghei früeners Topic dezue gfunde. Falls ich eins überseh han, bitte linke oder merge

Han mir de neu Samsung 27" Odyssey G90XF Moni kauft. Uflösig: 4K
3D ohni Brille. Qualitet isch de Hammer!

Leider funktioniere offiziell nur speziell defür lizensierti Games in 3D. Und das sind aktuell grad mol 14 Titel:
- The First Berserker: Khazan
- Lies of P
- Stray
- Dragonball Z:kakarot
- Little Nightmares II
- F.I.S.T
- SpongeBob SquarePants: The Cosmic Shake
- Wigmund
- Grand Theft Auto III – The Definitive Edition
- Grand Theft Auto: Vice City – The Definitive Edition
- Grand Theft Auto: San Andreas – The Definitive Edition
- Disney Epic Mickey Rebrushed
- The Smurfs - Dreams
- PALWORLD

Side-By-Side Film funktioniere au, sofärn sie gräuberlet sind
Original 3D Blaustrahl oder Konsole Fählazeig.

De Moni isch aber au als ganz normale 4K Gaming Monitor in 2D e Wucht, wenn für das ellei aber au e massiv übertüürti.

Usserdäm gits no en KI basierti 3D Funkion für 2D Material. d'Qualitet goht do vo unbruchbar bis eingermasse ok, je nach Quellmaterial, und natürlich isch das Urteil nach mine eigene 3D Asprüch.

d'Hardwareaforderige sind au nit ohni:
i7 Prozässor und RTX 3080 muesses mindeschtens si
Die 14 Games vom Reality Hub funkioniere nur in 4K Uflösig! Performance spare will mer dänkt 2K langet eim au, isch nit.
Bi Side-By-Side Maerial, isches hingege egal.

Möglicherwis lauft Reshade mit em Plugin "Depth3D" ufem Moni. Das würdi Türe zu sehr viel mehr Spiel öffne womer in 3D chönnt zöckle.
Han aber keini verlässliche Infos gfunde dezue im Netz. Wirdi übers Wuchenänd mol nöcher aluege.

Grundsätzlich funktionert 3D ufem Samsung so:

Wenn eins vode offzielle 3D Games möchtsch zöckle in 3D, schtartischs vom Samsung Reality Hub us. Das betrifft wie gseit erscht 14 Titel.
Bi dene Games gits es Overlay mit zwei Regler: Mit em erschte stellsch i, wie stark de 3D Effekt söll si. Mit em zweite bestimmsch dini virtuelli Position ufder z-Achse. Je witer links, deschto mehr spielt sich hinter em Bildschirm ab, je mehr de Regler nach rächts stellsch, deschto mehr chunnt usem Bild use.

Bi Filme oder Spiel wo nit zum Hub ghöre, ischs bitz andersch:
Sobald de Monitor e bewegti Szene im Fullscrreen Modus feststellt, wirsch per Overlay Menu gfrogt, ob ers söll via KI in 3D umwandle, oder ob ers als Side-By-Side Inhalt söll behandle. Ischtelle chamer da sunscht wies usgseht nüt. Sobald usem Fullscreen Modus usegosch wirds wieder 2D.

De Dolphin Emulator (Gamecube und Wii) lauft scho mol. Und wil dr Stereoskopie Effekt vom Emulator generiert wird, wirds wie ein 3D Film behandlet. De Vorteil isch, dasses am Monitor egal isch, was für e Uflösig igschtellt isch. De richtig Renderer (Vulkan) muess igschtellt si, und Fullsreen muess es laufe, denn funktioniert dr 3D Effekt.

3D... I weiss nid... Brille hin oder her...
Het mer nie viu gäh...

Wenn scho denn VR! Denn bisch tatsächlich mittedrin...

Aber d'technologie ohni brille isch scho faszinierend!

VR hani scho lang. Und du hesch natürlich rächt. Nüt chunnt ane gueti VR Erfahrig ane. Eimol mitte im Spiel drin gstande, und alles andere wird bedütigslos. Aber au an das gwöhnt mer sich leider relativ schnäll.

3D ohni Brille isch für mi no unverbrucht. dr Screen wird quasi zum Holodisplay. Das wirkt no bitz wie Magie. Ich wünschti mir, mi 3D Beamer chönnti das. Dr James Cameron hets eigentlich versproche mit der erschte Akündigung vo Avatar 2, aber dä Release isch denn so oft verschobe worde, dass ihm s'allgemeine Kinostärbe zuvor cho isch.

D'Faszination 3D Monitor ohni Brille, wird au bi mir dihei nit lang anehebe, und die ca.1300 Franke woner mehr koschtet het, als en verglichbare 2D Monitor, wärdes im Ändeffäkt nit wärt gseh si. Aber das isch mir egal. Ich bin scho immer en 3D Junkie gseh. Ich muess eifach alles usprobiere

i ha o über 1200 zahlt und mine het ke 3d!

Jones hat geschrieben: ↑17 Mai 2025 16:38 i ha o über 1200 zahlt und mine het ke 3d!

Das beruhigt mi es bitz. Denn wär de Unterschied no 680

Es Update:
De Nintendo 3DS Emulator Citra lauft ebefalls. 3DS Spiel sind natürlich für 3D gmacht, laufet also prinzipiell alli guet. Do liegts aber am Citra wo nonig alli Titel glich guet emuliert. Bi einige muess mer eifach geduldig si.

PC Spiel hani via VorpX versuecht. Dä chann jo au Side-By-Side, obwohl er immer wieder betont, dass er für VR gmacht segi, und Stereo für 3D Monitore mehr so es Experimänt für ihn seg. Am Afang hani kei Erfolg gha mit VorpX, aber irgendwenn isch mir klar worde, dass au do, de Vulkan Renderer de Schlüssel isch;

SBS + Vulkan + Fullscreen = 3D

Bemerkig am Rand zu PC Games via VorpX: Ohni Profil, kei SBS!
Es PC Game muess also sowohl es VorpX Profil ha, als au de Vulkan Renderer unterstütze. Wahrlich kei Wunschkomzärt!

also ich find 3D ohni brülle scho sehr spannend!
muess mal paar videos luege...

Mer chann im Reality Hub bi jedem Spiel dr Pfad ändere wo zum exe File füehrt. Witzigerwis wird nit überprüeft, ob das au s'richtige Game isch
So chamer jenschti anderi Games in 3D Spiele. Mer muess eifach mindeschtens 1 offiziells Spiel in der Lischte ha, demit mers chann mache.

Grundsätzlich söttet alli Unreal 4 Games laufe. Aber natürlich nit alli glich guet. Das liegt dra dass einigi Studios Tricks awände um Speicherplatz zspare. zb bi Liecht und Schatteffekt. Einigi Games wärdet gar nit dargstellt in 3D. Aber es git au durchus Games wo perfekt laufe. Isch leider Glücksach.

Frag: Die dritt Dimension gaht immer no nach inne nimmi ah?
Weiss no back then 3d tv ahand vo de produktfoti,s hani agnoh de effekt göch geg usse, also so holo mässig.
So föteli häts bi dem moni jetzt ebe au, aber vlt isch ja da eh neui technik umme? *curious*.

Egal ob sich dr 3D Effäkt hinter dr Gasschibe oder vor der Galsschibe vom Monitor abspielt, er brucht immer de Bildschirm als Projektionsflächi.
Es isch immer no en 3D Monitor, und kei Holographie

Ja de konzeptunterschied isch scho so

Heisst das jetzt de Moni also geg use 3d mache? Seb hani welle wüsse.

Btw: Sie händ doch mal en tote rapper mit hologram anere liveshow projeziert vor paar jahr, tupac, odb.

Bi Spiel wo mitem Reality Hub laufet gits en Regler wo chasch ischtelle obs nur nach inne söll go, oder au nach use.

Bi 3D Film im Half-SBS (Side-By-Side) Format, chasches nit ischtelle. Dört hängts ellei vom Film ab. Und do gits alles. Ganz extremi Bischpil wemer ellei dr Effekt beurteile, sind nach miner Erfahrig "Jaws 3D" und "Friday the 13th Part III". Dört chunnts Züg so wit usem Bildschirm use, dasses fascht im Gsicht hesch. Au sehr stark: IMAX Dokus wie zb Ocean Wonderland 3D.

Okay, krass das sind demfalls nöd nur marketing pics geg usse. Muess mal luege wohni da smal cha gseh, nimmt m wunder.

Bi Film nix istelle, hmm okay. Min samsung 3dtv, sicher 10jahr +, chasch wenn vids ladisch im sege öbs SBS oder überenand format isch. Und effektüfi i 4-5 stufe regle.
Findi no spannend, a was chlemmts?
-Technisch bedingt?
-FW/SW nanig so wiit?
-Anti Piracy?

ich erinnere mi no an de 3dtv player. De hani brucht zum Screenshots aluege woni mit em Nvidia 3DVision gmacht han. Jo, dört hetmer Tiefi chönne ischtelle wenni mi richtig erinnere. Es isch technisch au kei Häxerei. Muesch eifach Dischtanz zwüsche de beide Halbbilder vergrössere. Aber sie händs halt nit gmacht. Mi 3D Beamer (Optoma UHZ65LV) channs übrigens au nit.

Dass 3D überenand (Half-OU) nit goht, liegt an der Technik, wie der Samsung 3D erzügt.