The(G)Forum

+1 kraut

buffy want beer

wow du gsesch no soooo viel geils zeugs, nachher relativiersch alli serie wo'd bis jetzt gseh häsch freu dich, ich wünscht mir ich chönnts nomal "frisch" luege.

d stummfium-folg

unfassbar guet isch si gsi! und d "gentlemen", nid wenig gfürchig, mit ihrem grinse und ihrne "hünd". super atmosphäre gsi, und ganz grosses kino!

kraut hat geschrieben:d stummfium-folg

unfassbar guet isch si gsi! und d "gentlemen", nid wenig gfürchig, mit ihrem grinse und ihrne "hünd". super atmosphäre gsi, und ganz grosses kino!

i bi fasch abe!

us dere folg müesst mr no meh gifs mache.

the body nid schlecht isch si gsi, die folg!

u när der buffy-roboter

so, no 5 folge när bini fertig. morn oder übermorn isches also so wit.

i schribe de es usfüerlechs review, weni derzue chume. aber zersch no e frag:

angel luege?

ja

es isch nid ganz so luschtig und clever wie buffy aber es wird gäg de schluss sehr guet.

so, bi fertig. grad die letschti folg gluegt.

schribe wie gseit de no es lengers review über alli staffle, vilech chumi hüt no derzue, süsch de am sunnti oder nächst wuche.

muess das ganze no chli la sitze.

Ok i has nid chönne la si. Hie mis Review. Achtung es het Überlängi und isch wahrschinlech sehr verwirrend gschribe.
I tues i mehreri Teile poste, süsch wirds äuä chli unübersichtlech.

Würd mi wundernä was dir derzue säget.

Also, lets go!

Ahja, zersch no e Warnig:

MEGASPOILER CHÖME ITZ GRAD!!!!



Season 1:

Ok, die ersti Staffle. Was söui da nume säge? Isch eigetlech objektiv gseh scho zimlech grottig gsi. Sehr viu Standalone-Folge, z.T. ächt grauehaft schlächt. Z.B. chunntmer grad "I robot, you Jane" i Sinn, oder das mit der Gottesabätterin :typej: (Was isch eigetlech mit ihrne Eier ungerem Tisch passiert? Mir wärdes nie erfahre). Der Oberboss isch o nid so das Wahre gsi, und vor allem dä blöd Sougoof (the anointed one, oder besser gseit the annoying one höhöhö) het gnärvt.

Aber trotzdem: Vor Qualität zwar no nid uf der Höchi vo der spätere Stafflene, aber irgendöppis hetsi haut glich gha, süsch wäri ja chuum dranneblibe. Da wäre d Charaktere wo eifach super glunge si, ir erste Staffle vilich no chli sehr eidimensional, aber trotzdem. Der Giles, wiener ar Buffy im Pilot bir erschte Begägnig z "Vampyr"-Buech härechlepft, köschtlech. Der Xander isch scho denn e ganz luschtige gsi . D Willow der Sträber, d Cordelia die huere Bitch, der Angel, wo no so mystisch isch gsi. I chamer der WTF-Effekt richtig vorstelle, we me zerscht mau usefingt daser e Vampir isch. Hani halt scho gwüsst.

Was ou no typisch isch, bsunders für die 1. Staffle, aber ou no bis öppe zur 3., isch dä 90er-Jahr-Charme wos het gha. Der Humor, d Sprach (müesst mau ei Foug us der 1. Staffle u när eini us der letschte luege, isch no krass wie sich d Sprach veränderet het), d Chleider ( )...
Und usserdäm het Buffy denn würklech Superchräft gha. Isch ja nid zum säge, wär bis am Schluss aues gäge d Dämone kämpft hei :typej:

Im Grosse u Ganze also eini vo de schlechtere Staffle, wahrschinlech sogar die schlechtischti. Aber was söus, isch glich e guete Afang gsi, und wemes dürehautet wird me uf jede Fall belohnt.

Season 2:

Die 2. Staffle, z erscht Mau chunnt der Spike vor. Denn ischer no so richtig bös gsi. Später ischer ja e zimleche Weiche worde

Het mer sehr guet gfalle. Am Afang no chli harzig, het o wider rächt viu Standalone-Folge gha, z.T. rächt schlächti wie z.B. das mit der Mumie oder mitem Roboterfründ vor Mueter, aber när isches aber scho gli rächt guet abgange. Vorallem der Angel, wo sech i Angelus zrüggverwandlet, super isches gsi, v.a. ischer ändlech chli intressanter worde. Und natürlech der Spike mit sire düredräite Alte. Super isches gsi, woner der annoying one verbratet het.

D Cordelia het meh Screentime übercho, was sehr e gueti Entscheidig gsi isch. Es het erschti Päärli gä (natürlech näbe Buffy&Angel), Cordelia und Xander, Willow und Oz. Der Oz isch übrigens ganz e guete gsi. Nid schlächt hani gschtuunet woner sich z erschte Mal ine Werwolf verwandlet het. Aber öppis mues itz eifach mau gseit wärde: Wele gränzdebile Vouidiot het gmeint gha, e Mönsch imne hässleche Affekostüm machi e guete Werwolf???

Usserdäm: Die 2. Staffle het wahrschinlech z beschte Season-Finale gha überhoupt. Super isches gsi, und nid weni trurig am Schluss.

Season 3:

Die beschti Staffle? I würd säge, ja. Season 4, 5 und 6 hei zwar einzelni Episode gha mitere Qualität wos ou ir 3. nid gä het, aber derfür het hie eifach z Gsamtbild sehr guet gschtumme.

Der Mayor. Super ischer gsi, der bescht Bösewicht vo allne Staffle, v.a. wo när no d Faith derzue isch cho. Viel meh chani zu ihm gar nid säge, ussert dasi immer chli öppis z schmunzle gha ha, we är Screentime gha het.

D Anzahl vo de Standalone-Folge isch zum Glück zrügggange, aber wenn mau wider eini isch cho, de hets o e sehr gueti chönne si, wie denn wo d Anya z erscht Mal no als Dämon vorchunnt und d Cordelia wünscht, dass d Buffy nie in Sunnydale wär acho. Hehe, e gueti Folg isch das gsi.

Die ganzi Faith-Gschicht het mir o sehr guet dünkt, o we mir d Schouspielerin am Afang chli suspäkt isch gsi (jaja, mir wüsses, du bisch e ganz taffi Frou ). Aber wie si immer me zum Böse härezoge isch worde, het mi no rächt mitgno und isch ou zimlech gloubwürdig gschribe gsi.

Ussertäm: Z beschte Scoobyteam vo allne Staffle zäme: Buffy, Giles, Xander, Willow, Cordelia und Oz. Die hei eifach super zäme harmoniert. Und am Schluss no der Wesley

Z Finale isch super gsi, o wider eis vo de beschte (das wirdi hie äuä no viel säge...). Graduation, der Mayor wird zur Rieseschlange, d Highschool wird zerschtört. Me cha säge, z Finale vor dritte Staffle het so öppis wie es erschts Kapitel abgschlosse.

Season 4:

Und mit der 4. Staffle isch es nöis Kapitu eröffnet worde. Kei Cordelia me, ke Angel me und gli ou ke Oz me. Ke Bibliothek me Alles sehr schad, aber es isch irgendwie z verchrafte gsi. Was mi scho me trurig gmacht het, isch dass d Fründschafte irgendwie langsam usenang si. Natürlech nid ganz, aber trotzdem. Leider isch das bis zum Schluss eso blibe. Nie meh isch d Scoobygang so guet gsi wie ir 3. Staffle.

Mi dünkt, die 4. Staffle gheit so chli usem Rahme. Zersch mau z Setting am College wo ja nur i dere Staffle würklech präsent isch gsi, när isch alles so sunnig und farbeintensiv gsi, im Gägesatz zu de früechere und vor allem zu de spätere Folge. Und zerschte Mau isch o d Regierig ids Spiel cho, mit der Initiative. Wasi vo dere söu halte weisi übrigens immer no nid gnau. Isch scho no intressant gsi, und dank dere het o der Spike me Screentime übercho. Aber irgendwie hets nid so härepasst das ganze.

Es si es paar nöii Lüt derzue cho, d Tara und natürlech d Anya wo immer fürne Lacher z ha isch gsi. Und natürlech: Der Riley. Dä Typ isch mir rächt ufe Wecker gange, um ehrlech z si. Ha nie viu mit ihm chönne afah, bi froh gsi woner wider gange isch.

No öppis zum Oberboss: Dä isch rächt scheisse gsi, der Adam. Der schlechtischt Ändboss vo aune. Derfür isch z Finale super gsi, mau chli öppis anders. Sehr e gueti Idee vom Joss.

Was übrigens am beschte isch gsi: Der Giles. I dänke da grad a sini "Verchleidig" a Halloween. Der Sombrero. Super ischer. Oder woner als Songwriter i de Cafés isch ufträtte
Isch halt nid eifach, we de als Watcher nüm brucht wirsch.

Und der Xander, woner bi sine Eltere im Chäller isch gsi, gueti Zyte sis gsi. När ischer ja leider us sim Losertum usecho...

Und nid z vergässe: Eini vo de beschte Folge überhaupt hets ir 4. Staffle gha: Hush. Unfassbar guet.

Season 5:

Wär het sich bir 2. Folg vor 5. Staffle nid gfragt, ober äch irgendöppis verpasst het? Plötzlech het d Buffy e Schwöschter und aui tüe so als ob das normal wär. I bi mit chli blöd vorcho. Aber isch ja rächt schnäll ufglöst worde.

I muess säge, dasi am Afang rächt müeh ha gha mit der 5. Staffle. Wieso gnau weisi nid, obs mit der ungloublech schlächte Uftaktfolg (Dracula omg wie scheisse) ztüe het sei mal dahingestellt. Aber je länger si gloffe isch, desto besser bini dricho. Und i würd säge, dass si vo allne Staffle der höchst "Replay-Value" het. Super wäutklass Episode hets gha, allne vora natürlech "The Body". Super Inszenierig.

Wie gseit, Buffy het es chlises Schwöschterli übercho. Das hätt eigetlech ganz schön närvig chönne wärde, aber zum Glück hei d Schriber d Dawn nie z fescht i Vordergrund gstellt. So isches rächt erträglech gsi, und eigetlech isch die ganzi Gschicht mit der Dawn als Schlüssel doch rächt intressant gsi.

Der Spike merkt, dasser id Böffi verliebt isch und wird so ändgültig zum Obersoftie. Isch aber glich no witzig gsi.

Der Giles het us sire Arbeitslosigkeit usegfunde und e Magicshop ufta. Good Times. Sehr schöni Szene hets der inne gha.

Meh Müeh hani mitem Ändboss gha. D Glory isch rächt närvig gsi. Am Afang. Am Schluss isches derfür extrem abgange, mit eim vo de beschte Finales überhoupt. I gibes zue, ou ig ha es paar Tränli müesse verdrücke, u i bi süsch gar ke Heulsuse.

Nid z vergässe: Der Buffy-Bot. Wär hät nid gärn sone Roboter deheim?

Season 6:

D Buffy chunnt dank irne Fründe us der Höll zrügg, und was passiert? Die undankbari Bitch fröit sich nid mau! Aber när verzeut die doch am Spike, dass si nid ir Höll, sondern im Himmel isch gsi. Tamisiech, da bini fasch vom Stuel gheit i säg ders!

Die 6. Staffle het mi aber rächt enttüscht. Ligt vilech dran, wöui a verschidnige Orte gläse ha und verzellt ha übercho, dass es die beschti sig. Falsch! Klar, es het ou hie wider es paar vo de beschte Buffy-Folge überhaupt gha, "Once More, with Feeling" natürlich, oder "Tabula Rasa". Aber es het o sehr viel schlächti Folge gha.

Werum? I gloub, das hanget mitem Abgang vom Giles zäme. Woner wäg isch gange, isch d Show plötzlech wider ids Afangsstadium mit vielne Standalone-Folge gheit. Und es paar seeeehr schlächti hets drunter gha. Z.B. dert mitem Double-Meat-Burger. Am schlimmschte isch aber die gsi, wo der Riley no einisch zrügg isch cho. Die het mi so hässig gmacht, dasi nach der Helfti nur no füregspuelet ha.

Me het richtig gschpürt, wie wichtig der Giles für d Serie isch gsi. Er het das ganze Team zämeghäbt, isch äbe der Watcher gsi. Nach sim Abgang isches sehr düschter worde, und d Qualität het äbe scho drunger glitte. Aber woner när ir zwöitletschte Folg überraschend zrüggcho isch, hättet mi söue gseh, bi fasch düredräit!!

Ah ja, z Nerdtrio sött me nid vergässe. Was söui da säge. Si eigetlech no rächt witzig gsi, obwou me se nid so het chönne ärnscht nä. Ihri Erfindige si super gsi, und d Dialög mit de vile Aschpilige natürlech o.

Wär isch aber da der Ändboss gsi? Irgendwo hani gläse, ir 6. Staffle sig z Läbe der "Big Bad". Het vilech öppis. Aui si zimlech kaputt, d Buffy sowieso, Anya und Xander gheie usenand, d Willow wird zum Junkie, und nachdäm d Tara umbracht wird (die isch eigetlech o no e gueti gsi) wird sie pöse pöse.

Das tönt itz vilech chli negativ, aber natürlech isch ou die Staffle immer no sehr guet gsi. Halt eifach mit Abzüg.

Season 7:

So, la grande finale. I bi ehrlech gseit rächt positiv überrascht gsi. I ha vo verschidnige Site ghört (ou hie im Forum), dass die 7. Die schlechtischti Staffle söu si. Drum si mini Erwartige äuä rächt nidrig gsi. Aber so schlächt hets mi nid dünkt. Insgesamt isch si rächt konstant guet gsi, meh aber nid, derfür hets ou nid so schlächti Folge gha wie i angerne Staffle.

Ok, am Afang isch nid so klar gsi, wo das ganze überhoupt söu härefüere, aber so die letschte 10 Folge si sehr starch gsi. Was mi ou hie wider sehr schad het dünkt: Dass der Giles nüm i Houptcast isch ufgno worde, und dass d Scoobies rächt i Hintergrund si grückt und d Buffy z fescht im Fokus isch gsi.

Was mi extrem ufgregt het: Dass der Giles der Spike ine Hinterhalt het tribe, ohni ar Buffy öppis z säge. So öppis vo Out-of-Character, i bi richtig hässig worde. Das würd der Giles nie mache. Aber no schlimmer: Wo d Scoobies und d Potentials d Buffy als Leader abgwählt hei und a irer Stell d Faith hei wöue. Sone huere Bruntz, d Dawn würd niemals d Buffy usem Huus jage, d Willow und der Xander o nid. Das isch zimlech blöd gsi vo de Writers. Aber item.

Dünkts mi nume, oder hei si Budgetchürzige gha? Die ganzi Staffle het ja öppe nume a 2 Locations gspielt: Bir Böffi deheim und ir Schuel. Drum isch irgendwie das Chaos-Feeling ou nid richtig überecho. Die ganzi Stadt isch ja gflohe, aber wie gnau und so, das het me leider nie richtig gseh.

Aber es het wie gseit o viel Guets gha: Der Andrew, dä het für mi die ganzi Staffle praktisch im Alleigang grettet. Super ischer gsi. Oder der Nathan Fillion am Schluss als oberböse Pfaff. Sowieso: Z First Evil het mi vor Idee här no rächt guet dünkt. Die potenzielle Slayer si z.T. o no witzig gsi, z.T. hei sie aber o übelst gnärvt.

Und natürlech isch ou z Finale guet gsi. Der Spike het sech heldehaft für die andere ufgopferet, was eigetlech scho vo Afang a klar isch gsi, aber isch trotzdem guet gsi. D Anya isch ou gstorbe, het mi fasch e chli gemein dünkt, wüus so schnäll isch gange und sie när nüm isch beachtet worde. He, die isch immerhin im Houptcast gsi während 4 Jahr!!

Der Giles isch genial gsi am Schluss, wo si sech drüber gfröit hei, dass si z Hellmouth zerschtört hei: "Actually, there's another one in Cleveland"

Die letschti Ischtellig isch super gsi, perfekte Schluss. Nüt wär schlimmer gsi, we no irgend es "2 weeks later" oder so wär cho. Aber bi trotzdem trurig, hät no gärn es paar witeri Staffle gseh.

Fazit:

E super Serie, eini vo de bessere woni bis jitz ha gseh. Und gloub mer, i ha sehr viel gseh. Natürlech hets schlächti Folge gha, was bi 150 ja o nid erschtunt. Aber Scheissegal. D Serie het so viel Charme, Herz, super Dialög, Humor etc. gha und isch über die 7 Jahr hinwäg so konschtant guet gsi, dass me die weniger guete Sache problemlos i Chouf cha nä. I gibe e klari Empfählig ab, obwou i ehrlech gseit nid dermit rächne, dass ou nume irgendöpper hie no mitlist


Reihefolg vo de Staffle:

3
2 und 5
4
7 und 6
1

Aber das cha sich bimne Rewatch ändere. I möcht am liebschte grad itz afah, aber gopfertami, itz hani i nid mau 2 Mönet 150 Episode gluegt, itz sötti vilech mau chli öppis anders mache. Oder Angel luege...

Super review, nöd überall iiverstande aber top. Jetzt muesch angel luege. Und nachere ziit denn nomal en rewatch (han scho 4 hinter mir). Findsch jedes mal e anderi season besser. Am schluss gsehsch ii, dass alli uf ihri art eifach nume mega sind. Au die viert. Die viert findi mittlerwiile die luschtigschti. Uhuere viel zgröle gitts.
Aber ebe: angel luege. Isch ganz andersch aber irgend wie doch nöd.

säg mal häxler, wie würd dini lischte vo de stafflene usgse? also vo bescht bis schlechtischt?

Ha übrigens agfange mit angel. dünkt mi guet bis jitz. leider bini ufere buffy-site hölle gspoileret worde übere tod vo 2 figure. schisst mi huere a das ganze!

season 5
season 6
season 3
season 2
season 4
season 7
season 1

so eifach usem chopf use. aber wie gseit, ich finde s'vieri die luschtigscht. händs halt ali en total andere "vibe"

Dä Kraut super.

Once more with Feeling isch sooo wahnsinnig super, es früürt mich fast. Jahrelang hani dä Hägser usglachet und immer gseit was für en huerä Mongo er isch das er Buffen luäget, aber es isch ebe würklich absolute wahnsinn.. Härt, mehr glaubs gar nöd wänn mehr ab und zuä mal so inäzäpt

de trunks isch au wieder mol do