Will's ebe doch en integrale Bestandteil vo de Konsole isch. Das fangt bi de Benutzeroberflächi a, wo vom Hauptmenü bis zum Miiverse absolut uf em Prinzip vo de beide Screens ufbaut isch. Und es gaht bis zu de Spieli, wo halt doch au de Touchscreen, de zweiti Screen, d'Kamera, de Neigigsmässer, etc. bruched. Bim 3DS häsch vo Afang a d'Option gha s'3D abzstelle und drum händs dänn au de 2DS chöne bringe (wo sich erste Bricht zufolg sich aber au nöd so massiv super verchauft). Bim Wii U müessted's zerscht mal s'ganze OS umstelle und jedes Spieli patche (und gwüssi Spieli wie s'ZombiU würded gar nüme funktioniere) und das wär wahnwitzig. Zuedem ane würdet's mit so ere Kehrtwändi marketingtechnisch no en grössere Schlamassel arichte, als es bisher scho de Fall isch.warum chönds nöd eifach s tablet sause lah?
Nei, Nintendo mues es entweder schaffe, das Produkt so wie's isch doch no irgendwie sowiit im Märt z'etabliere, dass sie im Mindeschte e schwarzi Null demit schriibed, oder sie müend langfristig en gordnete Rückzug mit Blick uf en ehner früehnere als spötere Generationewächsel ufgleise. Beidi Optione sind verdammt schwierig und ich bin jedefalls gspannt, wie's wiitergaht. Kritisch isch es jedefalls zum Glück no lang nöd, sie händ nach wie vor no meh als gnueg Gäld im Kässeli (Sony gaht's diesbezüglich z.B. einiges schlächter, die stönd finanziell immer no relativ gföhrlich nöch am Abgrund).
