Jones hat geschrieben:Chürzlech glese:
Meh söu versicherige nid ahand vo de wahrschinlechkeit vome mügleche schade abschliesse sondern vom potentielle finanzielle schade. Macht total sinn findi!
Genau das in etwa hani gmeint. Drum macht z.B. en Haftpflicht durchus Sinn, oder zums bim Durbrenner Chrankakassä azluege, d Grundversicherig (was det allles drin söt sii und so isch en anderi Frog).
Hützutags isch oft devo d Reed Versicherigä usäzholä, und dass si sich lohned und dassmer irgendes 500.- fränkigs technischs Grät versichered, und dassmer guet versicheret isch, wenn eim d Kamera gstollä wird, und dass dies, und det nomol 20 Stutz will es chönt jo, und ich han zahlt also muesi irgendwiä wieder luege dass sich au gloht hed (und mer schreckt quasi vor Versicherigsbetrug nid zrug, willmer z dumm isch zum Begriffä was e Versicherig isch)...und all so Schwachsinn.
De Grundgedankä und de Charakter vonere Versicherig isch aber nid de dass sie sich söll lohnä, im Gägäteil, Versicherigä sind kei Wohltätigkeitsverein sondern Gschäfter. D Chundä zahled i de Summä immer meh wiäs uszahlt überchömed, und d Prämie isch grundsätzlich nach Wahrschindlichkeit berechnet, und wenn d Versicherig ihrä Job nid scheisse macht, verlangt si i de Summä immer sehr vil meh wiä sie uszahlt.
Drum sind diä sinnvollschtä Versicherigä diä, wommer immer numä zahlt und zahlt und zahlt, und absolut glücklich demit isch, wemersi so wenig wiä möglich mues in Aspruch neh, am beschtä gar niä. Wemer niä en Unfall macht und öper in Rollstuel bringt, oder e übli Chrankheit hed, unds um Elend und Chöschtä god, womer sälber schlicht nid, oder nur mit no vil grösserem Elend chönti beweltigä. Wenn ich allerdings mol de Fall han dass ich 500.- mues heräblättere, will mir öpis kaputt gangä isch, oder ich diä voll Franchisä vo 2500.- mues zahlä, will ich sit über emene Johrzehnt mol wider zum Dokter mues, god mini Wält nid under...
Es gid natürlich scho Fäll wo e chli en anderi Sichtwiis nid nur blöd isch. Vollkasko bimene neuä Auto isch villicht nid immer Schwachsinn. Es Gschäft wo sich d Sicherheit "chauft" bimene Usfall vo irgendöpis sofort en Ersatz zha, willmer vorher quasi scho dri investiert hed, oder dass öper wo wäg irgendeme Problem weiss dasser ständig bim Arzt isch, nid diä högscht franchisä nimmt, sondern diä tüüfscht...aber do redemer vom Charakter her denn eigentlich scho ehnder vomene Service Vertrag, nüm vonere Versicherig.
Marco_in_motion hat geschrieben:
Darum verlängered sich Versicherigspolicene selbständig wiiter, damit mer kein Deckigsunterbruch hät wo mer nöd sälber verahlasst hät.
Au das isch wieder ä nid ganz falschi Sicht uf d Sach...aber nur ei Sitä vo de Medaille. Dia ander isch, dass d Versicherigä mit dem System dia ehnder passivi Alag vo de Mänschä usnützed, und diä, willsi nid ständig wieder demit konfrontiert werded, bzw. vergässäd was überhaupt alles händ, i de Regel no ewig Versicherigä eifach zahled wos mol abgschlossä händ, unabhängig devo öbs überhaupt Sinn macht, oder si inzwüschä uf verschiedeni Art sibä mol s glichä versichered händ.
Aber ja, wär natürlich scho nid ganz praktisch, wemer jedes johr wieder alles neu müest abschlüssä, und wemers vo Afang a guet macht söts sich jo au nid ständig alles ändere...aber ebä, au do en witere Grund nur s nötigscht drin zha. Ich bin allerdings au öper wo sich ungern ständig mit dem Züg beschäftigt.