Legend of Zelda: Breath of the Wild

[mr.raw]

Wie dr Xinobrax2 seit...Gitt e WiiU und e NX Version...

Meh WiiU wird höchschtens mit eme richtige Pokemon verkauft...ansunschte stagnierts ab em Summer.

[Gurgelhals]

Ich bin mer also nöd sicher, öb Ändi 2016 tatsächlich scho e neui Konsole chunnt. En nume 4-jährige Läbeszyklus hätts bi Nintendo no nie gäh und mir wüssed, wie konservativ de Betrieb isch. D'Wahrschinlichkeit, dass e neui Konsole ehner spöter als früehner chunnt, isch bi dene drum grundsätzlich grösser.

Us strategischer Sicht wär e neui Konsole per November 2016 sicher nöd s'tümmscht, aber ebe: Isch Nintendo. Sie händ au de Wii U es Jahr z'spat bracht (Läbeszyklus vom Wii 6 statt de üebliche 5 Jahr). Und ich bin mir ehrlich gseit au nöd sicher, öb sie das alles schaffed bis Ändi 2016. Sie bruched ja nöd nume e neui Konsole, sondern au no d'Software und parallel dezue isch dänn bald au mal en 3DS-Nachfolger fällig und au für de brucht's Spieli. Das alles innerhalb vo eim Jahr launche - ich glaube nöd, dass Nintendo für das die nötige Kapazitäte hätt (siehe s'Software-Lineup im erschte Jahr bim Wii U und au bim 3DS -> catastrof!). Und Third Parties, wo softwaresiitig i d'Bresche springe würded, gitt's ja au nüme.

Zum Zelda: Wänn de vom Aonuma gnännti Grund für d'Verschiebig stimmt, isch es doch eigentlich e gueti Nachricht. Ich meine, was gitt's bessers als Nintendo wo seit: "Mir händ während de Entwicklig es paar neui Ideeä fürs Zelda gha, wo so super sind, dass mir s'Spieli verschiebed, will mer sie unbedingt wänd umsetze." Isch doch exakt das, was me vo Nintendo will ghöre.

[Herr Rossi]

Die chönd vo mir us no 2 Jahr dra schaffe, solangs keis repetitivs Zelda a la Skyfark abliferet.

[zwirrlibatz]

Ich finds marktstrategisch komisch, so früeh e neui konsole azchünde, wenn die aktuell nöd guet lauft. Da wartet de bisher unentschlossni chöifer doch ersch rächt uf die neu. Anderersiits isch es unternähme ohni roti zahle diesbezüglich halt au freier. Dass sie de wiiu aber nöd mit waveraces, fzeros, metroids undoder gliichwertig neuem bediene, isch für mich scho es rätsel.

[Gurgelhals]

Bim Wii U gitt's doch chum meh unentschlosseni Chäufer. Weder de Mario 3D World no de Mario Kart no de Smash händ da no gross öppis useglupft, de Zug isch also definitiv abgfahre. Entsprächend gaht's bim Wii U nume no drum, die bestehendi Chundschaft möglichst z'befriedige, dass zmindescht die nöd für die nörchscht Generation vo Bord gaht. Das macheds agesichts vo de Umständ imho au rächt guet: Es chömed zwar nöd viel Spieli, aber s'Niveau isch durchgehend extrem höch und s'Spektrum ziemlich breit.

Wachse wärdeds aber erst wieder mit ere neue Konsole chöne, drum spielts kei Rolle, öb sie jetzt scho devo redet oder erst i eme Jahr. Ich bin ehner echli skeptisch was de Generationewächsel betrifft. Da hätt Nintendo mit em Wii, 3DS, Wii U, usw. eifach jedes mal s'Problem gha, dass schlicht und eifach d'Kapazitäte nöd händ chöne ufbringe, sprich: I de 12 Mönet vor em Launchtermin chunnt nüt meh für die alte Grät, will me ja mit Hochdruck a de neue Generation schafft, und i de 12 Mönet nach em Launch chunnt ebefalls nüt Gschids für die neue Grät, will me mit de Launchtitel bereits komplett usglaschtet gsi isch. Wänn's aber de Launch wieder versiebed, dänn wärded's au mit ere neue Generation kei unentschlosseni Lüüt chöne überzüüge.

Sie händ momentan ebe scho chli viel uf em Tisch: Wii U-Nachfolger, 3DS-Nachfolger, d'Mobile-Initiative, die ganzi Quality of Life-Gschicht, usw. Wahrschinlich erfahred mer dänn a de GV im Mai chli öppis neus über d'Zuekunftsstrategie.

[Xinobrax2]

Mit de Zykle hesch natürlich recht...anderersits erschints mir eifach unsinnig es Spiel wie Zelda für e halb toti Konsole z entwickle, wenns nid au no en Plan B git. Plan B chan natürlich au öpis völlig ander si aber was büted sich me a, als de erfolgrichi Start vo de Wii nachem eher mässige Cube Erfolg als Blaupause z verwende?

Was gits us Marketing-Sicht bessers als e noiji Konsole miteme Zelda z launche? Genau, di aktuell Konsole mitem gliche Spiel au grad no z pushe

[zwirrlibatz]

jede mitmene wiiu chauft s'neue zelda. bim momentane stand wäred das scho 9mio, also s'zweitverchauftischt jemals.

[Gurgelhals]

Was gits us Marketing-Sicht bessers als e noiji Konsole miteme Zelda z launche? Genau, di aktuell Konsole mitem gliche Spiel au grad no z pushe

Zelda isch afaik kein richtige System Seller, sondern "nume" en Core-Titel für s'Nintendo-Stammpublikum. D.h. es verchauft sich dadure zwar locker es paar Millione mal (und das v.a. im Weschte; z'Japan sind's nöd so Zelda-Fans), aber nöd im zweistellige Millionebereich wie das bi de Pokemons, Marios und Mario Karts de Fall isch.

Aber ja, wänn 2016 bereits en Wii U-Nachfolger chunnt, dänn büütet sich e Twilight Princess-Aktion a. Hätt damals bim Cube/Wii-Generationewächsel nämlich gar nöd schlächt funktioniert und es Zelda als Launchtitel isch sicher nöd s'tümmscht, will die Serie sich ja ebe primär a die Lüüt richtet, wo sich die neue Konsole jewiils zum Launch chaufed. S'Spieli gar nüme uf em Wii U z'bringe findi hingäge chli riskant. Gäbt wohl en ziemliche Backlash, au wänn de gröschti Teil vo de Zelda-Zielgruppe zu de Nintendo-Early Adopters ghöred.

[Xinobrax2]

Zelda isch afaik kein richtige System Seller, sondern "nume" en Core-Titel für s'Nintendo-Stammpublikum. D.h. es verchauft sich dadure zwar locker es paar Millione mal (und das v.a. im Weschte; z'Japan sind's nöd so Zelda-Fans), aber nöd im zweistellige Millionebereich wie das bi de Pokemons, Marios und Mario Karts de Fall isch.

Ich spile zwar gern Mario und mengisch au mal Pokémon...aber d Konsole selber chaufi mir eigentlich immer nur wegem Zelda. Ich han bis jetzt na kei Wii U. K, ich bin wahrschinlich nid repräsentativ...aber trotzdem

[agestuffer]

Perfekt zum no irgend en HD Remake Compilation uf wii usäbringä das Jahr¨!!! Oder??
agestuffer

[onion]

s'einzige wo mich überrascht isch das de aonuma nachem skyward sword ken fristlose becho het.

[Gurgelhals]

s'einzige wo mich überrascht isch das de aonuma nachem skyward sword ken fristlose becho het.

Zelda Cycle in Aktion. Aktuell sind alli am motze, aber sobald dänn s'nörchschte Zelda erschiine isch, finded alli s'Skyward Sword plötzlich mega

[damian]

jetzt wos seisch. s'Celda händ au alli mega dumm gfunde bis dänn s'Twighlight Princess usecho isch.

Ich find s'Skyward Sword übrigens extrem super. Jetzt mal abgseh devo dasses kei zämehängendi welt sondern verschiedni gebiet sind und dasses zum teil chli gar chinderfründlich gmacht isch findis absolut perfäkt. Wunderschön, sehr abwechslugsriich und originell. Ich weiss ächt nöd wieso das spiel damals nöd meh ghypt worde isch. D'stüürig isch au absolut super ufd wiimote umgsetzt.

[Xinobrax2]

S Celda hend d Lüt tumm gfunde, wils vorher e verdammt geili Zelda Techdemo für de Cube zeigt hend. Logisch ischmer denn chli apisst wens miteme Comic-Look deher chömed. Das änderet allerdings nüt dra, dass s Spiel selber super isch.


Quelle

Ah ja, Skyward Sword isch ebefalls zimlich super gsi.

[abyss]

En HD Version vom Skyward wär scho fein. Hani leider verpasst ufem Wii. Und no en Metroid HD Collection bitte.

[Gurgelhals]

Ich find s'Skyward Sword übrigens extrem super. Jetzt mal abgseh devo dasses kei zämehängendi welt sondern verschiedni gebiet sind und dasses zum teil chli gar chinderfründlich gmacht isch findis absolut perfäkt. Wunderschön, sehr abwechslugsriich und originell. Ich weiss ächt nöd wieso das spiel damals nöd meh ghypt worde isch. D'stüürig isch au absolut super ufd wiimote umgsetzt.

S'Hauptproblem vom Skyward Sword isch lediglich, dass dir d'Fi d'Lösig vo jedem einzelne Rätsel im Spieli uf em Silbertablett präsentiert, bevor du überhaupt realisiert häsch, dass es Rätsel isch. Alles andere sind Bagatelle. Vor allem isch es farblich extrem schön, was bsunders uf em Dolphin sehr guet zum Usdruck chunnt:



Irgendwo han ich mal gläse, dass sich d'Entwickler bim Look vom Matisse, vom Cezanne und vo de impressionstische Malerei händ inspiriere lah. Jedefalls händs d'Farbpalette extrem schön und stimmig usgwählt. Jedefalls e massivi Verbesserig gägenüber em Twilight Princess, wo ja so en komisch blasse Look gha hätt (und das nöd eifach nume wäge de detailarme Texture. Es würkt det meh, als hett me nachträglich überall namal d'Kontrast- und Sättigungswert künstlich reduziert - definitiv keis schöns Spiel).

Ganz allgemein händ die einzelne 3D-Zeldas alli irgendwie ihri ganz eigene Stärchene und Schwächene. Ocarina of Time und Majora's Mask sind die unsterbliche Klassiker, ganz klar - s'einte isch revolutionär und eis vo de ganz grosse Miyamoto-Meisterwerk, s'andere wohl s'originellschte, dichtischte und abgfahreschte Zelda überhaupt. Aber nachher wird's komisch: Wind Waker gseht superschön und superherzig us, d'Idee mit em Sägle isch nöd ohni und es hätt de beschti Ganondorf vo de ganze Serie; defür isch es sehr repetitiv bis z.T. sogar langwiilig, es hätt erwiesenermasse Löcher (Dungeons, wo's nüme is Spiel gschafft händ, usw.) und s'Sägle verlüürt schnäll a Reiz. S'Twilight Princess hätt mit de Midna de beschti Companion vo de Serie und die wahrschinlich beschte Dungeons vo allne 3D-Zeldas, aber d'Oberwält isch defür läär und langwiilig. Und s'Skyward Sword probiert sehr viel neui Sache us, isch we gseit farblich / designmässig sehr super und es hätt die beschti Zelda vo de ganze Serie, aber s'Handholding isch extrem übel.

[Herr Rossi]

Naja, isch halt gschmackssach. Mir gfallt die Oberwelt vom TP brutal guet und au die trischte Farbe findi super. S Skyward hed mi so krass gnervt dasis nid mol beendet ha, sones verkackts schpil, repetitiv mit zwar sehr guete Idee. Aber kei würklichi Oberwelt bzw e usenandgrissni. D Story isch au e Seich... A allne andere Zeldas (vo Nintendo) hani suscht grossi Fröid gha, jedes schtarch uf sini Art und Wiis. Vo mir us chönds zum überbrücke es TP HD Remake bringe

[Moff]

s'gröscht problem a skyward sword sind die viele repetitive passagene gsi, d'oberwelt hetmer au ned gfalle. vo dem abgseh ischs es guets zelda gsi. ich hans besser i erinnerig als TP, aber a TP chan ich mich chum erinnere, müessti mal wieder spiele.

[Gurgelhals]

s'gröscht problem a skyward sword sind die viele repetitive passagene gsi, d'oberwelt hetmer au ned gfalle. vo dem abgseh ischs es guets zelda gsi. ich hans besser i erinnerig als TP, aber a TP chan ich mich chum erinnere, müessti mal wieder spiele.

Ich han grad chürzlich s'TP uf em Dolphin komplett duregspielt (de Dolphin isch ändlich sowiit, dass das absolut ohni Problem und Slowdowns gaht). Und zwar d'Gamecube-Version will kei Fuchtelscheisse. Das mit em chum chönne erinnere isch bi mir nämlich au so gsi. De Grund isch glaubs de, dass es d'Dungeons an sich fast alli sehr guet sind, aber s'Drumume - d'Oberwält, d'Oberwält-Quests zwüsched de Dungeons, d'Sidequests, de Wolf, ja sogar s'Ross, ... - alles echli beliebig und zämehangslos dethär chunnt und s'eigentliche Potential da bi Wiitem nöd voll usgschöpft wird. Es fählt chli wie en klare rote Fade / e Dramaturgie (storymässig aber au allgemeiner was de Spielfortschritt betrifft), wo däre Sach de nötigi Drive würd gäh (zuedem: die erschte 1-2 Stund sind müehsam und vor allem laaaaangsam und de erschti Dungeon isch dänn au grad no de schlächtischt vom ganze Spiel) und drum händ mer wahrschinlich s'meischte inzwüsche wieder vergässe. Anderersiits: D'Dungeons Nr. 3 bis 7 ghöred hingäge ganz klar zu de beschte Zelda-Dungeons überhaupt und das isch scho es grosses Plus. Ich glaubs keis anders Zelda hätt eso e höchi Azahl würklich grossartigi Dungeons.

Irgendwie han ich de Idruck, dass Nintendo bi de Zeldas immer probiert, d'Schwächene vom Vorgänger z'vermiide und defür dänn anderi Sache vernachlässigt. S'Skyward Sword korrigiert ja grad die schwachi Dramaturgie ziemlich radikal, indem det d'Oberwält praktisch abgschafft isch und die einzelne Passage/Abschnitt alli sehr dicht, guet zämehängend und au Schlag uf Schlag chömed. Und jetzt mached's mit em Zelda Wii U wieder e 180° Drähig und mached wieder Open World.

Ah ja, PS: All das isch sälbstverständlich motze uf allerhöchschtem Niveau. Wänn me jetzt da no s'einte oder andere bessere Action-Adventure vo irgendere Third Party als Vergliich dezue näh würd, wär natürlich sofort klar, i wellere Liga jedes Zelda letschtlich spielt.

[Xinobrax2]

Ich han ersch grad vor es paar Täg agfange mitem TP im Dolphin. Bonus Info: Es gset super us in HD S sind zwar no di gliche Texture aber s passt wunderbar.

[mr.raw]

S Celda hend d Lüt tumm gfunde, wils vorher e verdammt geili Zelda Techdemo für de Cube zeigt hend. Logisch ischmer denn chli apisst wens miteme Comic-Look deher chömed. Das änderet allerdings nüt dra, dass s Spiel selber super isch

Genau wäg dem Look hann ich s Zelda aagfange teschte und liebe (friener NIE öppis könne mit Zelda aafange). Ha zwar WindWaker immer noni gspielt aber de look hett mi sehr wunderig gmacht. Ha denne mit Minish Cap aagfange und has müesse duurespiele. Denn witter gange mit allne kommende Mobile Versione bis jetz zu between Worlds. Für mi isch between Worlds s schönschte Zelda. Jo, ich weiss...uff de grosse Konsolene no nie eis in de Finger kha. Jedefalls wartet WindWaker (WiiU) version no dehei uffs duurezöggle...

[zwirrlibatz]

uff de grosse Konsolene no nie eis in de Finger kha.

s'TP (...) Und zwar d'Gamecube-Version will kei Fuchtelscheisse.

wo bin ich????


bescht bim TP fuchtle isch wemme vom ross im volle galopp obe abe kämpft. heyaaa zack!

[onion]

S Skyward hed mi so krass gnervt dasis nid mol beendet ha, sones verkackts schpil, repetitiv mit zwar sehr guete Idee. Aber kei würklichi Oberwelt bzw e usenandgrissni. D Story isch au e Seich...

[Supersonic]

Cutscene? Whaat! Wer glaubt das mer 2015 s'neue Zelda spielt de isch de dümmst

This!

[evo]

gägenüber em Twilight Princess, wo ja so en komisch blasse Look gha hätt (und das nöd eifach nume wäge de detailarme Texture. Es würkt det meh, als hett me nachträglich überall namal d'Kontrast- und Sättigungswert künstlich reduziert - definitiv keis schöns Spiel).

hän jo au alli fans nach eme "erwachsnigere" und düstere zelda gruefe nachem windwerkler.
wills au widermol duremache.