Thema Revolut: Ha mir jetz doch so es Teil zuegleit. Nach chli teste han ig jetz es paar Hiwiise für die wos viellech au wei probiere. Der Start isch chli holperig.
Wies scho isch beschriebe worde: Im Prinzip isch das e Prepaid-Kreditkarte, han ich au so benutzt. Es git no anderi Services (Versicherig, Kryptowährige, Lounges etc.), die han ig aber nid brucht oder sie si no gar nid freigschalte. Zudem han ig nur der Standard-Preisplan.
Ha also es Konto mit der Revolut-App eröffnet und mit Geld betankt. Am schnellste geits uflade mit ere andere Kreditkarte, das kostet aber Gebühre. Per normaler Überwiisig uf es Konto bei der Credit Suisse kostets nüt. Die Option taucht aber nid sofort uf, es zeigt erst nur Apple Pay und ebe Kreditkarte ah. Nach chli umedrücke und sueche i der App isch de d Option Überweisung plötzlich uftaucht, zäme mit der IBAN. Übersichtlich isch anders.
Anyway, ds Geld isch mir 1 Tag nach der Überwiisig uf em Revolut-Konto guetgschribe worde. Als nächst han i e physikalischi Kreditkarte bstellt (Mastercard), het 7 Stutz kostet. D Kreditkarte chunt us Frankfurt, d Lieferig duuret ca. 14 Täg.
Als nächsts han i d Revolut-Kreditkarte in Dütschland testet:
1. Tankfüllig wölle zahle -> Transaction declined
2. Ässe im Burger King wölle zahle -> Incorrect PIN
3. Am Geldautomat 40 Euro wölle abhebe -> Vorgang ist nicht möglich
Ich so: :typej:
Immerhin, nach em Versuech mit em Geldautomat het sich schliesslich d App gmeldet: Bargeldbezug nicht möglich, weil dies in Ihrem Konto deaktiviert wurde. Soso, han ich das deaktiviert? Gar nid gwüsst.
Nach chli sueche i de Optione han i denn au das gfunge was isch falsch igstellt gsi. D Sicherheits-Optione si schlicht missverständlich formuliert gsi, evtl. isch das in Englisch besser erklärt.
So chasch am Automat Geld abhebe (d.h. d Option aktiviere, dass die deaktivierti Bargeldabhebung deaktiviert isch
)
So chasch am Automat kei Geld abhebe (d Option isch deaktiviert, so isch die deaktivierti Bargeldabhebig aktiv
)
Zudem isch es guet möglich dass me d Karte ersch mit eme Bargeldbezug muess aktiviere, darum het sich d App bei de erste beide Versüech wohl nid gmeldet. I der App steit so öppis zwar gschriebe, aber nid dass me explizit am Geldautomat muess öppis go abhebe zum d Kreditkarte aktiviere.
Nach dere Hürde hets schliesslich funktioniert, ha also testet ob me mit dem Teil würklich so viel günstiger unterwegs isch:
- 40 Euro Bargeld mit der Revolut-Karte abghobe: Fr. 44.90, keini Gebühre. (Kostet aber 2% sobald me mehr als 200 Euro pro Monat tuet abhebe.)
- 40 Euro Bargeld mit der Postfinance-Karte abghobe: Fr. 45.52, Gebühre Fr. 5.00.
- Tankfüllig mit der Revolut-Karte zahle (27.30 Euro): Fr. 30.74
- Tankfüllig mit der Cumulus-Mastercard zahle (21.05 Euro): Fr. 24.50
D Transaktionsbestätigung isch instant cho, no während der Autorisierung het sich d App gmäldet und gseit wele Betrag belastet wird. Nachbelastige oder anderi nachträglichi Korrekture am Betrag hets keini geh. Wie me gseht isch me bi dene niedrige Beträg tatsächlich es paar Rappe günstiger unterwegs. Zudem kostet der Bargeldbezug keini Gebühre, wenn me unter 200 Euro pro Monet blibt.
Fazit: Wenns de mol endlich funktioniert de laufts zuverlässig mit em Revolut. Au schön, dass d Benachrichtigung über der belasteti Betrag sofort chunt. Da chöi sich anderi Kreditkarte-Unternehme e Schibe abschniide. Nur d Kontaktlos-Funktion würd ig nid nutze, die het nid richtig funktioniert. Chönt aber au a de Terminals gläge ha, per PIN zahle het immer funktioniert. Ich wirds au witerhin nutze zum im Usland chliiners Züg demit zahle. Grossi Sache aber eher nid. Für das isch mir d App schlicht ds überlade, und teils si au Texte komisch formuliert. Und so wies daher chunnt han i ehrlich gseit au kei grossi Lust der Support ds kontaktiere wenn mol öppis nid sött klappe.