Trunks hat geschrieben:Dä Goose schriibt richtig, wie u.a. bi Office isch ihne einzig und ällei dä Abo-Service wichtig. Dä Spielimarkt isch so massiv grösser als die 200-300 Millione Glöön wo sich Konsole chaufet pro Generation.
Microsoft isch mit Azure uhuere guet ufgstellt, dass sie das XstreamDingens chönd umsetze und bald din Chüelschrank und din Toaster chan dä Gamepass abspiele. Das wot da ine chum eine, aber sie probieret halt dä grösseri Markt z‘erreiche damit sie ihre Abo-Service chönd mache. Wie‘s Netflix gmacht hät (ich glaub sogar uf minere Zahbürste häts es Netflix -App, guet d‘Switch immer nonig) oder sie sälber mit Office (isch sit öppe eme Jahr auf uf em Mac 1:1 die glichi Version). Ihne isch d‘Hardware eigentlich scheiss egal, glich müends eus Nerds was büüte damit mehr nöd mit Heugable und Fackle im Internet tumult machid. Drum bringets d‘Scarlett und säget immer wieder - sie wänd am meiste Power ha i dä nächste Generation. Gsämmer dänn, s‘Gäld dafür händs.
Und mit dä Studio möchets es gschiid, sie bruchet es möglich diverifiziert Portfoolio wo so viel Lüüt wie möglich aspricht und regelmässig neus Züügs usebringt. Drum bruchets dringend die neue Teams. So bliibet d‘Lüüt bim Abo däbi und tugget schön. Uf Resetera hät eine was guets gschriebe zu dem Thema, Spiderman hät sich MEGA verchauft, sicher 10 Millione oder meh - aber insgesamt sind 60-80 Millione PS4 (kei Ahnig wie viel aktuell) verchauft worde. 50 Millione händ dä Spinnelemah nöd kauft, für die musch au Games mache. Netflix macht ja us allne Sparte sälber Sache oder chauft - Action, Liebesfilm, Trickfilm, Horror usw. so bhaltisch ä grossi Mängi a Lüüt i dim Abo, kostet huere viel - aber Microsoft häts Gäld.
Ich find dä Gamepas uhuere super - gseh aber scho s‘Problem mit „Spieli sind nüme dine usw“. Euses Hobby verändert sich (nöd komplett), genau wie das passiert isch bi dä Mosig (Spotify) oder Serie (Netflix usw.). Und grad Netflix häts zeiget - viel Gäld durch die Abis ermöglicht au huere abgfahrnigs Züügs, nöd alles muess sich xx millionefach verchaufe. Das chan sehr guet sie für die Industrie. Oder au nöd. Was weiss ich scho.
Guete post! Mittlerwile sis aber äuä scho fasch 75 millione wo dr spinnelemah ( huere guet ) nid kouft hei, aber derfür hei mittlerwile fasch 90 millione lüt, a die 900 millione games kouft, und das isch Gäud, scheiss viu Gäud sogar, und dür sone Gamepass ( wo günstig isch und je nach games, wo eim nid wärde ghöre, viu z biete het, ) chunt nid mau asatzwis so viu Gäud ine, für niemer, weder füre publisher no füre entwickler no füre Platform härsteuer. Z einzige wo für d Zuekunft chönt klappe für so es Angebot / Modäu wär wenn aui, sprich Sony / Nintendo / Xbone sich würde zäme due und 1 Platform würde lanciere, und das wird nie passiere ( zum glück, de so würd jedä sini identität verlüre, und da hät ms am wenigste z verlüre simer ehrlech ). Für mi persönlech isch games a la netflix scheisse, vorauem wenns jedä wot afa mache, super när hesch abos für PS, EA, Activision, Ubisoft, Xone, Nintendo und no meh?? När hesch zu 95% nume no Bullshit und low budget games wie bi Steam... Nei merci